Archives
Sign In

You are seeing this because you have not yet updated your iBlog. Click on settings to edit...

Joburg
Sign InSign Up

Uhlelo Lokwabela Uzulu Izabelo Kumankampani Emazweni Soluqaliswa Emabhanga eZimbabwe

13 years ago | 6022 Views
Abaqondisi bamabhanga emazweni ase Zimbabwe athi umphathintambo wezokuthuthukisa inotho kazulu uMnu. Saviour Kasukuwere useqalisile ukutshukana labo ngokuthi balandele uhlelo lwe Indigenization loba kusobala ukuthi amabhanga angeke abele uzulu amashares afunwa nguhulumende adlula okuyisilinganiso sokumatshumi amahlanu lanye ekhulwini.

Abaqondisi laba bathi uMnu. Kasukuwere uzondiswe yikuthi kabakavezi indlela abazakwabela ngayo uzulu amashares loba baqalisa ukukhulumisana laye ngaloludaba ngoNtulikazi.

Bathi amanye amabhanga alakho ukwabela uzulu amashares ayisilinganiso sokulitshumi ekhulwini kuphela.

UKasukuwere uthi lokhu yikuhlambaza inzalo ye Zimbabwe efuna ukuthi izithuthukisele inotho kulokuthi iphile ngemali evela kwamanye amazwe.

Ingcwethi kwezenotho zithi amabhanga angeke ehlukane lamashares ngoba yiwo aphethe inotho ye Zimbabwe ngakho-ke azatshukana loKasukuwere kuze kube phakade.

Eyinye yalezingcwethi uMnu. Eric Bloch uthi amabhanga angadilika nxa uKasukuwere engaqhubeka ezama ukuwabamba ngamandla ukuthi alandele uhlelo lweIndigenization.

Kodwa-ke ingcwethi kwezombusazwe uMnu. Livingstone Dzikira uthi kumele uhlelo lolu luqhubekele phambili emabhanga loba kungasoze kuthokozise usibalukhulu webhanga le Reserve Bank uMnu. Gideon Gono ongahambelani lokwenziwa nguKasukuwere.

Ingcwethi kwezenotho uMnu. Masimba Kuchera uthi amabhanga la emazweni ahlukuluzwa yilabo abakubandla le ZANU-PF abafuna ukuthi kwesulwe izijeziso zenotho ezafakelwa uMongameli Robert Mugabe labanye bakhe ngamazwe angentshonalanga.
0 Malema
Tags: Uhlelo,Indigenisation,Empowerment

Comments

Comment as Anonymous Submit
Invite
What iBlog
Friends
iNdabaNdaba | Follow | 179 Blogs